1 ചേർന്നിടും നാം ഭാഗ്യനാട്ടിൽ എന്താനന്ദം
അല്ലലെല്ലാം മാറി ഉല്ലാസമായ്,
ക്രിസ്തൻ പേർക്കായ് കഷ്ടം സഹിച്ചവർ വാണിടുമേ
ക്രിസ്തൻ നാമം ധരിച്ചെന്നെന്നുമേ... ചേർന്നിടും നാം

2 ആത്മാവിൻ ശക്തിയിൽ കാക്കുന്നോർക്കായി
സ്വർഗ്ഗത്തിൽ സൂക്ഷിക്കും നിക്ഷേപങ്ങൾ
വാട്ടം മാലിന്യം ഏശാത്തവകാശം പ്രാപിച്ചീടാൻ
നമ്മെ തനിക്കായി വീണ്ടെടുത്തു... ചേർന്നിടും നാം

3 കഷ്ടങ്ങളേറ്റം വർദ്ധിച്ചെന്നാലും
ഒട്ടും ഭയം ഇല്ല പിന്മാറില്ല
വിട്ടീടുമേ ദുഷ്ടലോകത്തിൻ പ്രതാപങ്ങളെ
വിൺ വീട്ടിൻ ദർശനം കണ്ട ശുദ്ധർ... ചേർന്നിടും നാം

4 ലോകത്തിൻ മാലിന്യം വിട്ടോടിപ്പോയോർ
വീണ്ടും അതിൽ വീണു തോറ്റു പോയാൽ
എത്ര കഷ്ടം എത്ര ഭയങ്കര വീഴ്ച്ചയത്
മറ്റാരും രക്ഷിപ്പാനില്ലിഹത്തിൽ... ചേർന്നിടും നാം

5 ഉന്നതദൗത്യം പാടേ മറന്ന്
ലോകത്തിൻ പിന്നാലെ ഓടീടുന്നോർ
ഓർത്തീടുക സ്വർഗ്ഗ സൗഭാഗ്യങ്ങളെല്ലാം നഷ്ടം
ചിന്തിച്ചനുതപിച്ചീടിൽ ഭാഗ്യം... ചേർന്നിടും നാം

6 കാന്തയിൻ വസ്ത്രം എത്രയോ ശുഭ്രം
ശുദ്ധന്മാർ നീതി പ്രവർത്തികളാൽ
ഹല്ലേലുയ്യാ! ജയത്തിൻ ഘോഷസ്വരം മുഴങ്ങും
കുഞ്ഞാട്ടിൻ കല്യാണവേളയതിൽ... ചേർന്നിടും നാം