ഈ പ്രതികൂലങ്ങൾ മാറി പോകും
ഈ ശൂന്യതയിൽ സമൃദ്ധി വരും
ഈ ജീവിതമനുഗ്രഹമാകും
ഈ ദൈവത്തെ ഞാൻ അറിഞ്ഞതിനാൽ
ഞാൻ അന്യനല്ല ഞാൻ അന്യനല്ല
എന്റെ ദൈവത്തിൻ സ്വന്തമത്രേ

ആരാധനാ ആരാധന
സ്തുതിയും പുകഴ്ച്ചയും ദൈവത്തിന്
ആരാധനാ ആരാധനാ
മഹത്ത്വവും മാനവും ദൈവത്തിന്
മനുഷ്യരിലാശ്രയം ക്ഷണികമല്ലോ
എന്റെ ദൈവത്തിലാശ്രയം ശാശ്വതമേ

ഈ മിസ്രയീമിൽ ഞാൻ തീരുകില്ല
ഈ സംഹാരകൻ കടന്നു പോകും
ഈ ചെങ്കടൽ മുന്നിൽ വഴി തുറക്കും
ഈ മരൂഭൂമി ഞാൻ തരണം ചെയ്യും
ഞാൻ അടിമയല്ല ഞാൻ അടിമയല്ല
എന്റെ ദൈവത്തിന് പൈതലത്രേ - ആരാധനാ

ഈ അഗ്നി എന്നെ ദഹിപ്പിക്കില്ല
ഈ സിംഹങ്ങൾ വായ് തുറക്കുകില്ല
ഈ പ്രാർത്ഥന ഞാൻ മുടക്കുകില്ല
ഈ ദേശമെൻ ദൈവത്തെ അറിഞ്ഞീടും
ബലഹീനനല്ല എന്നിൽ ധൈര്യം
പകരുന്നൊരാത്മാവിൻ ശക്തിയുണ്ട്‌ - ആരാധനാ

ഈ അഭിഷേകം വെറുതെയല്ല
ഈ ശത്രു എന്നെ ജയിക്കയില്ല
ഈ രട്ടു മാറി സന്തോഷം വരും
ഈ ദുഃഖം നീങ്ങി ഞാൻ നൃത്തം ചെയ്യും
ഞാൻ ഭയപ്പെടില്ല എന്റെ കൂടെയുള്ളോൻ
ഈ ലോകത്തേക്കാൾ വലിയവൻ - ആരാധനാ