പാവന സ്നേഹത്തിൻ ഉറവിടമേ
സ്വർഗ്ഗം വെടിഞ്ഞോനേ
പാപികളാം നരരെ രക്ഷിപ്പാൻ
ക്രൂശെടുത്തൂ നീ

സാഹസം ചെയ്യാതെ വഞ്ചന ഇല്ലാതെ
എല്ലാം സഹിച്ചവനെ
നിൻ പിതാവിൻ ഇഷ്ടം ചെയ്‌വാൻ
സ്വയം സമർപ്പിച്ചു

1

സത്യത്തിൻ സാക്ഷിയായ്
ഭൂവിൽ ജനിച്ചെന്ന്
സാക്ഷ്യം പറഞ്ഞതാലെ

സത്യം എന്തെന്നറിയാത്ത
നാടുവാഴി യേശുവെ മർദ്ദിപ്പിച്ചു
ചാട്ടവാറിൽ മേനി കുരുങ്ങി
എനിക്കായി തൻ രക്തം
ചാലായി ഒഴുകി അടിപ്പിണരാൽ
ഏവർക്കും സൗഖ്യമേകാൻ

2

കണ്ണിൽ ദയയില്ല കണ്ടുനിന്നവർ
ആർത്തിരമ്പുമ്പോൾ

ദുഷ്ടരാം പാപികൾ യേശുവെ മർദ്ദിച്ചു
മുള്ളുകിരീടം ചാർത്തി
നിൻ തിരുമേനി എനിക്കായി യാഗമായി
തന്ന രക്ഷകനെ
സാക്ഷാൽ എൻ വേദന, രോഗങ്ങൾ,
പാപങ്ങൾ തൻ ചുമലേന്തി

3

ആടിനെപ്പോലെ നാം ചുറ്റി
അലഞ്ഞപ്പോൾ തേടി വന്നവൻ

അറുക്കപ്പെട്ട കുഞ്ഞാടായി
നമ്മെ വീണ്ടെടുക്കാൻ
കാട്ടൊലിവായ എന്നെ നല്ല ഒലിവാക്കുവാൻ
പുത്രനെ തന്നല്ലോ
ആയിരം ആയിരം നാവിനാൽ നിൻ
സ്നേഹം വർണ്ണിപ്പാൻ ആവതില്ലാ

4

ദിവ്യമായ സ്നേഹമേ, അനശ്വര
സ്നേഹമേ, ക്രൂശിൻ സ്നേഹമേ

എന്നെ നീ വീണ്ടതാൽ
നിൻ മകനാകയാൽ
നിൻ കൂടെ വാഴും ഞാനും
പാടുമേ ആ നാളിൽ
വീണ്ടെടുപ്പിൻ ഗാനം വിശുദ്ധരോടൊത്തു
കാഹളനാദത്തിൽ ഞാനും ഉയർത്തന്നു
സ്വർഗ്ഗഗേഹം പൂകിടും