പാരിൽ പാർക്കും അല്പായുസ്സിൽ
ഭാരങ്ങളധികം വേണ്ടിനി
കാരിരുമ്പാണിയേറ്റവൻ
ഭാരങ്ങൾ വഹിച്ചിടും

ഞാനെൻ പാദങ്ങൾ വെച്ചിടും
നീങ്ങിപ്പോകാത്ത പാറമേൽ
എനിക്കായി പിളർന്ന പാറമേൽ

വൻ തിരകളലറുമ്പോൾ
തീരം വിട്ടു ഞാൻ പോകുമ്പോൾ
എൻ പടകിൽ ഞാനേകനായ്
ആശയറ്റെന്നു തോന്നുമ്പോൾ

ചാരത്തുണ്ടെന്നോതുന്ന
പ്രിയന്റെ സ്വരം കേൾക്കും ഞാൻ
പ്രിയന്റെ സ്വരം കേൾക്കും ഞാൻ

രോഗദുഃഖങ്ങളേറുമ്പോൾ
മനഃപീഢകളേറുമ്പോൾ
ക്രൂശിൽ പങ്കപ്പാടേറ്റതാം
യേശു മാത്രമെന്നഭയം

മാറിൽ ചേർത്തണച്ചിടും
ചേറിൽ നിന്നുയർത്തിടും
കാതിൽ സാന്ത്വനം ഓതിടും

ദേഹം മണ്ണിലുപേക്ഷിച്ചു
പ്രാണൻ പ്രിയനിൽ ചേരുമ്പോൾ
ഗോളാന്തരങ്ങൾ താണ്ടിടും
യാത്രയിലും പ്രിയൻ തുണ

കാണും മറുകരയിൽ ഞാൻ
വീണ്ടെടുത്തോരിൻ സംഘത്തെ
എന്നെ കാത്തുനിൽക്കും സംഘത്തെ

കൺകൾ കാണാ മറുകര
ഇമ്പങ്ങൾ വിരിയും തീരങ്ങൾ
സ്വർണ്ണസരപ്പളികളാൽ
കണ്ണഞ്ചിക്കുന്ന വീഥികൾ

എൻ സ്വന്തമായിത്തീരുമ്പോൾ
യേശുവിൻ പാദം മുത്തും ഞാൻ
പൊൻവീണകളിൽ പാടും ഞാൻ