പൊന്നാവണിയായ് പൂത്താലവുമായ്
കണിത്തുമ്പികൾ ഈ വഴി വരവായ്
പൊന്നാതിരയേ വരവേറ്റിടുവാൻ
വെൺപൂവുകളും നാടുമൊരുങ്ങി

മുക്കുറ്റിപ്പൂമണത്താൽ
എന്റെ മുറ്റം നിറഞ്ഞൊഴുകി
ഓണപ്പാട്ടിന്നൊലിയാൽ
എന്റെ ഉള്ളം കവിഞ്ഞൊഴുകി

ഓണനിലാവിലായിരം
ഓർമ്മകളോടി വന്നിതാ
ഓർമ്മതൻ തേരിലേറി എൻ
പൂമകൾ ചാരി വന്നിതാ

രാവിൻ പൊൻമടിയിൽ
വെൺചന്ദ്രിക വീണുറങ്ങി
മണ്ണിൻ പൂവനിയിൽ
പൊൻ താമരത്താരൊരുങ്ങി

കാതിൽ തേൻപുഴയായ്
കിളി പാടുന്നീരടിയിൽ
നെഞ്ചിൽ പൂത്തുലയും
തിരുവോണപ്പൊൻ പുലരി

മുറ്റത്തെ മുല്ലയിൽ മുന്നാഴി പൂക്കളിൽ
കാലം നന്മകളോതുന്നു
കാണുവാനേറെ കൊതിച്ചൊരാ പൂമിഴി
നെഞ്ചിൽ ഇന്നുമുണരുന്നു

ഇനിവരുമാതിരയിൽ
പ്രിയനേ നിൻ സ്വപ്നങ്ങളിൽ
വാടാമലരായ് വിരിയാൻ
കൊതിയേറുന്നേ പ്രിയമേറുന്നേ
കൊതിയേറുന്നേ പ്രിയമേറുന്നേ

പൊന്നാവണിയായ് പൂത്താലവുമായ്
കണിത്തുമ്പികൾ ഈ വഴി വരവായ്

പൂവിൽ പൂന്തളിരിൽ
നിഴലോടും പൂങ്കാറ്റും
കാവിൽ കല്പടവിൽ
ചിരി തൂകും പൊൻവിളക്കും

ചിങ്ങപ്പൊൻ വെയിലും
പുതുരാവും രാക്കനവും
നീയും നിൻ മൊഴിയും
കുളിരേകുമെൻ നെഞ്ചോരം

ഓരടിക്കുന്നിലൊരായിരം താരകൾ
വാനിൽ പൂമഴ തീർക്കുന്നു
അമ്പലമുറ്റത്തെ ആൽത്തറയോരത്തൊ
രാതിരാ പൈങ്കിളി പാടുന്നു