വിനയമുള്ളോരു ഹൃദയമെന്നിൽ
മെനഞ്ഞിടേണമേ ദൈവമേ
അനുദിനം തവ ഭാവമെന്നിൽ
വിളങ്ങിടാൻ കൃപയേകിടൂ

ദിനം ദിനം ഞാൻ ദൈവമേ
മറന്നു പോയ് നിൻ ദാനങ്ങൾ
സ്വാശ്രയത്തിൽ നിഗളിയായ്
സ്നേഹവാനേ ക്ഷമിക്കണേ

നിഗളമെൻ നയനങ്ങൾ മൂടി
ഇരുളിലാക്കിയെൻ ജീവിതം
കോപമെൻ അധരങ്ങൾ മൂടി
പരുഷമാക്കിയെൻ മൊഴികളെ

അന്യരിൽ ഞാൻ നന്മ കാണാൻ
തുറന്ന മനസ്സെനിക്കേകുക
എന്നിലെ ഇല്ലായ്മ കാണാൻ
ആത്മദർശനം ഏകുക

താഴ്ചയും സൗമ്യതയുമെന്നിൽ
അനുദിനം വളർന്നീടുവാൻ
താവകാത്മാവെന്റെയുള്ളിൽ
വാണിടേണം നിത്യമായ്