అదిగదిగో అల్లదిగో
కల్వరి మెట్టకు దారదిగో
ఆ ప్రభువును వేసిన సిలువదిగో

గెత్సేమను ఒక తోటదిగో
ఆ తోటలో ప్రార్ధన స్థలమదిగో
అచటనే యుండి ప్రార్ధించుడని
పలికిన క్రీస్తు మాటదిగో

శిష్యులలో ఇస్కరియోతు
యూదాయను ఒక ఘాతకుడు
ప్రభువును యూదులకప్పగింప
పెట్టిన దొంగ ముద్దదిగో

లేఖనము నెరవేరుటకై
ఈ లోకపు పాపము పోవుటకై
పావనుడేసుని రక్తమును గల
ముప్పది రూకల మూటదిగో

చలి కాచుకొను గుంపదిగో
ఆ పేతురు బొంకిన స్థలమదిగో
మూడవసారి బొంకిన వెంటనే
కొక్కొరొకోయను కూతదిగో

యూదుల రాజువు నీవేనా
మోదముతో నీవన్నట్లే
నీలో దోషము కనుగొనలేక
చేతులు కడిగిన పిలాతుడాడుగో

గొల్గొతా స్థల అద్దరిని
ఆ ఇద్దరు దొంగల మధ్యమున
సాక్షాత్తు యెహోవా తనయుని
సిలువను వేసిరి చూడదిగో

గొల్లున ఏడ్చిన తల్లదిగో
ఆ తల్లికి చెప్పిన మాటదిగో
యూదుల రాజా దిగి రమ్మనుచు
హేళన చేసిన మూకదిగో

దాహము గొనుచున్నాననుచు
ప్రాణము విడిచెను పావనుడు
పరిశుద్ధుడు మన రక్షకుడేసు
మన మది యేమో గమనించు